Харилцаа холбооны зохицуулах хорооны Өргөн нэвтрүүлгийн зохицуулалтын газраас Улаанбаатар хотын өргөн нэвтрүүлгийн телевизүүдийн дууны найруулагч, инженерүүдэд “Дууны сонсогдолтын хүчийг түвшитгэх EBU R-128 зөвлөмж”-ийг практикт хэрэгжүүлэх талаар сургалт зохион байгууллаа.

Энэхүү сургалт нь телевизийн үйлчилгээ эрхлэгчдийн дамжуулж байгаа нэвтрүүлэг, кинонууд, ялангуяа тэдгээрийн дундуур дамжуулж буй реклам, зар сурталчилгааны дууны түвшинг жигдлэх чиглэлээр зөвлөмж өгч, Европын Холбооны EBU R-128 зөвлөмжийг хэрэгжүүлэхтэй холбоотой тусгай зөвшөөрөл эзэмшигчийн үүргийг танилцуулан тулгарч буй асуудлуудыг ярилцаж, харилцан санал солилцох боломжийг бүрдүүлэх зорилготой юм.

Сургалтаар олон улсын EBU R-128 зөвлөмжийн үндсэн зарчим, дууны сонсогдолтын хүчийг түвшитгэх аргачлал, үндсэн хэмжигдэхүүнүүд, практик хэрэгжилтийн талаар зөвлөмж өгч, мөн EBU R-128 зөвлөмжийн хэрэгжилтийн байдлыг үнэлэх зорилгоор  2024 онд телевизүүдээс авсан судалгааны үр дүнг танилцууллаа. Сургалтад өргөн нэвтрүүлгийн телевизүүдийн 20 дууны найруулагч, инженерүүд оролцов. Улаанбаатар хотын арилжааны телевизүүдийн дууны найруулагч, инженерүүдийг 2025 оны 2-р улиралд тус  сургалтад хамруулахаар төлөвлөн ажиллаж байна.

Харилцаа  холбооны зохицуулах хорооноос телевизүүдийн дууны сонсогдолтын хүчний хэт өндөр, нам байдал, суваг солих хооронд дууны түвшний зөрүүтэй байдлыг шийдвэрлэх зорилгоор Дууны сонсогдолтын хүчийг түвшитгэх EBU R-128 зөвлөмжийг практикт хэрэгжүүлэх, хэрэгжилтэд хяналт тавих ажлыг эрчимжүүлэх чиглэлээр тодорхой арга хэмжээг авч хэрэгжүүлж байна. Тухайлбал:

·       EBU R-128 зөвлөмжийн хэрэгжилтийн байдлыг үнэлж, цаашдын арга хэмжээг тодорхойлох зорилгоор  2024 оны 10-р сард телевизүүдээс судалгаа авч, үр дүнг танилцуулан цахим хуудсаар мэдээлсэн.

·       EBU R-128 зөвлөмжийг практикт хэрэгжүүлэхэд анхаарах асуудлуудыг тусгасан зөвлөмжийг 2024 онд боловсруулж, Зохицуулах хорооны цахим хуудсанд байршуулсан. (www.crc.gov.mn - Зохицуулалт > Өргөн нэвтрүүлэг > Зөвлөмж, судалгаа)

Телевизүүдийн дууны түвшнийг түүврээр тогтмол хянах хяналтын цэгийг 2025 оны 2-р сард байгуулаад байна. Хяналтын үр дүнг холбогдох телевизүүдэд тогтмол хүргүүлж, дууны түвшин хэт чанга эсхүл сул байгаа нэвтрүүлгүүдийн огноо, цаг, хэмжилтийн нарийвчилсан график, хүснэгтэн мэдээллийг өгч, зөвлөмж, чиглэл хүргүүлэхээр ажиллаж байна.

Сургалтын дараа хяналтад хамрагдсан 4 телевизийн инженерүүдэд хяналтын ажлын явцыг танилцуулж, зөвлөгөө мэдээлэл өглөө.

Харилцаа холбооны зохицуулах хороо
Өргөн нэвтрүүлгийн зохицуулалтын газар