Харилцаа холбооны зохицуулах хорооны 2011 оны 07 дугаар тогтоолоор батлагдсан “Телевиз, радиогийн өргөн нэвтрүүлгийн зохицуулалтын ерөнхий нөхцөл шаардлага”-ын 6.4 “Нэг цаг тутамд дамжуулах зар сурталчилгаа нь арван таван минутаас хэтрэхгүй байна.” гэсэн  заалтын биелэлтийг хангуулах ажлын хүрээнд Улаанбаатар хотод үйл ажиллагаа явуулж байгаа телевизийн үйлчилгээ эрхлэгчдийн эфирт тус нөхцөл шаардлагын 11.2.1-т заасны дагуу мониторингийг 2011 оны 3 дугаар сараас эхлэн тогтмол хийж байна.

Дээрх мониторингийг хийхдээ зар сурталчилгаа гэдэгт эхлэл төгсгөл нь үзэгчдэд ойлгомжтой, рекламны ролик хэлбэрээр хийгдсэн арилжааны зар сурталчилгаа, бизнес мэдээ болон зарын цагийг тооцдог. Харин захиалгат нэвтрүүлэг, хомшоппинг, телешоппинг, телевизийн өөрийн хөтөлбөрийн танилцуулга, бараа бүтээгдэхүүн сурталчлаагүй нийгмийн шинж чанартай мэдээллийг зар сурталчилгааны хугацаа тооцоход оруулдаггүй болно. 

Мониторингийн дүнгээр телевизүүд зар сурталчилгааны хэт өндөр хэтрэлттэй байсан тул тус хорооноос нөхцөл шаардлагад заасны дагуу сануулах арга хэмжээг авсны дүнд хэтрэлт буурсан үзүүлэлттэй байгаа боловч хангалтгүй биелэлттэй телевизүүд байсаар байна.

Иймээс Тусгай зөвшөөрлийн гэрээний 8.2.3 “Телевизийн нэг цаг тутамд дамжуулах зар сурталчилгаа нь арван таван минутаас хэтрэхгүй байна гэсэн заалтыг зөрчвөл 750000 /долоон зуун тавин мянган/ төгрөгний анзыг ногдуулах;” гэж заасны дагуу 2012 он болон 2013 оны мониторингийн дүнгээр өргөн нэвтрүүлгийн телевизүүдэд АНЗ ноогдуулаад байна.

Мониторингийн дэлгэрэнгүй дүнг эндээс үзнэ үү.

Өргөн нэвтрүүлгийн нэр бүхий телевизүүдийн зар, сурталчилгааны хэтрэлтийн зөрчил арилахгүй байгаа тул тус хорооноос дараагийн удаагийн анзыг хэтрэлтийн хэмжээгээр ялгавартай тогтоохоор төлөвлөөд байна.

Телевизийн үйлчилгээ эрхлэгчид нь тус хороонд хандаж өөрийн телевизийн мониторингийн хураангуй болон дэлгэрэнгүй тайлан, өдөр бүрийн протоколыг авч үзэх нь нээлттэй байдаг.