Шуудангийн үйлчилгээ эрхлэх тусгай зөвшөөрөл эзэмшигчдийн удирдах ажилтнууд болон үйлчилгээний менежерүүдэд зориулан шуудангийн үйл ажиллагааг чанарын өндөр түвшинд, эрсдэлгүй, найдвартай гүйцэтгэхэд шаардлагатай мэдлэгийг олгох, төрийн байгууллагуудын зүгээс тавьж буй шаардлага, өгч буй заавар зөвлөмж, шинэчлэгдсэн мэдээ мэдээлэл зэргийг нэгдсэн журмаар олгох  ээлжит сургалтыг 2025 оны 03 дугаар сарын 17-ны өдөр зохион байгууллаа.

Тухайн сургалтад Харилцаа холбооны зохицуулах хороо, Гаалийн ерөнхий газрын Улс хоорондын шуудан илгээмжийн гаалийн газар, Татварын ерөнхий газар, Цагдаагийн ерөнхий газрын Хар тамхитай тэмцэх газар, хүргэлтийн үйлчилгээний систем, программ хангамж нийлүүлэгч байгууллагуудын төлөөлөл оролцож, илтгэл танилцуулсан. Сургалтаар шуудангийн салбарт үйлчилгээ эрхэлж буй аж ахуйн нэгжүүдийн ажилтан, удирдлагууд мэдвэл зохих шаардлагатай сэдвүүдийг хэлэлцлээ. Үүнд:

-   “Мансууруулах бодис, сэтгэцэд нөлөөлөх бодисыг шуудангийн илгээмжээр илгээх, дамжин орохоос урьдчилан сэргийлэх, хор уршгаас сэрэмжлэх мэдээлэл өгөх”; 

-      “Цахим төлбөрийн баримтын систем ба Нэмэгдсэн өртгийн албан татварын хууль, хэрэглээ”;

-        “‘Улс хоорондын шуудан илгээмжийн гаалийн газрын 2024 оны тайлан”;

-   “Дотоодын шуудангийн бүртгэл хяналтын систем, программ хангамж нийлүүлэгч байгууллагуудын танилцуулга”     

“Мансууруулах бодис, сэтгэцэд нөлөөлөх бодисыг шуудангийн илгээмжээр илгээх, дамжин орохоос урьдчилан сэргийлэх, хор уршгаас сэрэмжлэх мэдээлэл өгөх”; -  У.Дэлгэрхишиг: Цагдаагийн ерөнхий газрын Хар тамхитай тэмцэх газрын Урьдчилан сэргийлэх, хамтын ажиллагааны хэлтсийн ахлах мэргэжилтэн, цагдаагийн ахмад;

“Цахим төлбөрийн баримтын систем ба Нэмэгдсэн өртгийн албан татварын хууль, хэрэглээ”- Б.Энхзаяа: Татварын ерөнхий газрын Татварын улсын байцаагч;

“Улс хоорондын шуудан илгээмжийн гаалийн газрын 2024 оны тайлан” -  Т.Байгаль, Гаалийн ерөнхий газрын Улс хоорондын шуудан илгээмжийн газрын шуудангийн тусгай зөвшөөрөл эзэмшигчид хариуцсан Гаалийн улсын байцаагч;

 “Дотоодын болон улс хоорондын шуудангийн үйлчилгээ эрхлэх тусгай зөвшөөрлийн нөхцөл, шаардлага"-ын "3.10. Шуудангийн илгээмжийн бүртгэл, хяналтын цахим системийг технологи ажиллагаандаа нэвтрүүлж, хэвийн ажиллагааг хангана." гэсэн заалтын хэрэгжилтийг хангуулах хүрээнд дотоодын шуудангийн үйлчилгээ эрхлэгчдэд дэмжлэг үзүүлэх зорилгоор систем, программ хангамж нийлүүлэгч Маркетшоп худалдааны технологи ХХК өөрийн Дэлко хүргэлтийн системийн талаар танилцуулгыг хийлээ. Мөн Монгол инфинити шуудан ХХК, Бокс фокс ХХК, Ултимэт солюшнс ХХК байгууллагуудын төлөөлөл оролцож өөрийн үйл ажиллагаа, программ хангамжийн шийдэл, мэдээллийг шуудангийн үйлчилгээ эрхлэгчидтэй солилцов.

“Маркетшоп худалдааны технологи ХХК-ийн Дэлко хүргэлтийн системийн танилцуулга” - Э.Ганзориг, Маркетшоп худалдааны технологи ХХК-ийн гүйцэтгэх захирал

Мөн сургалтад тавигдсан илтгэлүүдийг хилийн чанад дахь шуудангийн үйлчилгээ эрхлэгчдэд зориулан https://crc.gosmart.mn/ сургалтын цахим платформ дээр оруулснаар орон зай, цагийн зөрүүнээс хамаарахгүйгээр мэдлэг, мэдээлэл авах боломжийг олгох юм.

Шуудангийн Зохицуулалтын Газар