Харилцаа холбооны зохицуулах хорооны дэргэдэх Хүүхдийг зохисгүй агуулгаас хамгаалах радио, телевизийн хөтөлбөрийн дүрмийн хэрэгжилтэд хяналт тавих Орон тооны бус зөвлөлийн 2025 оны нэгдүгээр улирлын ээлжит хуралдаан 03 дугаар сарын 26-ны өдөр зохион байгуулагдлаа.
Тус хороо нь Өргөн нэвтрүүлгийн тухай хуулийн 30 дугаар зүйлийн 30.1.7.а дахь хэсэгт заасан чиг үүргийн хүрээнд радио, телевизээр хүүхдэд зохисгүй агуулга нэвтрүүлсэн тухай гомдол болон 18+ ангилалтай кино, бүтээлийг цагийн хязгаарлалт зөрчиж нэвтрүүлсэн зөрчлийн хяналт мониторингийн дүнг зөвлөлөөр хэлэлцдэг. Зөвлөлийн шийдвэрийн дагуу холбогдох телевизүүдэд зөвлөмж, мэдэгдэл хүргүүлж, олон нийтэд мэдээлэх зэрэг арга хэмжээг тогтмол авч хэрэгжүүлж байна.
Хуралдааны эхэнд радио, телевизийн хөтөлбөрт хүүхэд хамгаалах асуудлыг чиг үүргийн хүрээнд хэлэлцэж, дараах асуудлаар хамтарсан уулзалт зохион байгуулав.
Кино урлагийг дэмжих тухай хуулийн 21 дүгээр зүйлийн 21.3 дахь хэсэгт “Монгол Улсын нутаг дэвсгэрт кино түгээхэд баримтлах насны ангилал тогтоох шалгуур, кино түгээхэд баримтлах журмыг Кино урлагийн зөвлөл, Харилцаа холбооны зохицуулах хороотой хамтран батална” гэж заасан байна.
Иймд энэ удаагийн хуралдааныг Кино урлагийн зөвлөлийн Ажлын албаны даргын 2025 оны 3 дугаар сарын 17-ны өдрийн А/10 тоот тушаалаар байгуулагдсан Монгол Улсын нутаг дэвсгэрт кино түгээхэд баримтлах журам, насны ангилал тогтоох шалгуур үзүүлэлтийн төсөл боловсруулах ажлын хэсэгтэй санал солилцох хамтарсан уулзалт хэлбэрээр зохион байгууллаа.
Хамтарсан хуралдаанаар:
ü Зөвлөлийн гишүүдээс Монгол Улсад мөрдөгдөж байгаа “Өргөн нэвтрүүлэгт насны ангилал тогтоох, таних тэмдэг ашиглах шаардлага MNS 6587:2016 стандарт”-ыг танилцуулах;
ü Өргөн нэвтрүүлэгт мөрдөгдөж байгаа насны ангиллын стандарт болон Кино урлагийг дэмжих тухай хуульд заасан кино түгээхэд тогтоох насны ангиллын ялгаатай байдал, уялдаа холбооны талаар нэгдсэн ойлголтод хүрэх;
ü Насны ангиллыг тогтоох, кино түгээхэд анхаарах асуудлууд, насны ангилал тогтоох шалгуур болон хэрэгжилтийн асуудлаар тус бүрийн байр суурийг илэрхийлж, санал солилцох;
ü Кино болон өргөн нэвтрүүлгийн салбарт хүүхдийг зохисгүй агуулгаас хамгаалах зохицуулалтын уялдааг хангах гэх мэт асуудлаар журмын төсөл боловсруулахад анхаарах асуудлыг хэлэлцлээ.
Харин Орон тооны бус зөвлөлийн хуралдаанаар дараах асуудлыг хэлэлцэв. Үүнд:
1. Хүүхдийг зохисгүй агуулгаас хамгаалах орон тооны бус зөвлөл болон ХХЗХ-ны Өргөн нэвтрүүлгийн зохицуулалтын газраас 2025 онд хүүхдийг зохисгүй агуулгаас хамгаалах, радио телевизийн дүрмийн хэрэгжилтийг хангуулах чиглэлээр авч хэрэгжүүлэх ажлуудын танилцуулга.
2. 2025 оны 1-р улиралд Хүүхдийг зохисгүй агуулгаас хамгаалах Радио, телевизийн хөтөлбөрийн дүрэм зөрчсөн зохисгүй агуулгатай холбоотой гомдол ирээгүй болно.
3. Орон тооны бус зөвлөлийн 2024 оны 4-р хуралдаанаас гарсан зөвлөмж, мэдэгдлийн дагуу 18+ тэмдэглэгээтэй кино, нэвтрүүлгийг цагийн хязгаарлалт зөрчиж, өдрийн цагаар нэвтрүүлсэн болон Радио, телевизийн хөтөлбөрийн дүрэм зөрчиж зохисгүй агуулга нэвтрүүлсэн телевизийн үйлчилгээ эрхлэгчдийн мониторингийн тайлантай танилцаж зөрчлөө арилгасан, дахин давтсан эсэхийг хэлэлцэв. Үүнд:
· 2024 оны 4-р улирлын мониторингийн дүн, 2025 оны 1 сарын мониторингийн тайлан;
· 18+ тэмдэглэгээтэй нэвтрүүлэг киног цагийн хязгаарлалт зөрчиж, өдрийн цагаар буюу 06-22 цагийн хооронд гаргасан - 11 телевиз;
· Насны ангиллын тэмдэг тэмдэглэгээ буруу тавьсан болон насны ангиллын тэмдэглэгээ огт тавилгүйгээр хүүхдэд зохисгүй гэж үзэж болох агуулга бүхий киног өдрийн цагаар нэвтрүүлсэн - 5 телевиз;
· Дээрх телевизүүдээс Радио, телевизийн хөтөлбөрийн дүрмээр хязгаарласан зохисгүй агуулга бүхий киног өдрийн цагаар нэвтрүүлсэн 9 телевизийн мониторингийн тайланг танилцуулж хэлэлцлээ.
Дээрх 12 телевизэд мэдэгдэл хүргүүлсэн боловч 5 телевиз ( MNC, М кино, Channel 11, Хөгжил, Малчин) зөрчил давтсан. Тодруулбал, эдгээр телевиз нь Телевизийн хөтөлбөрт тавигдах шаардлага-ын 4.4, 4.7-дах заалт, Хүүхдийг зохисгүй агуулгаас хамгаалах радио, телевизийн хөтөлбөрийн дүрмийн 2.5.2 ,2.5.4, 2.8.2 дэх заасныг тус тус зөрчиж, өдрийн цагаар гаргасан дээрх кино нэвтрүүлэгт зохисгүй агуулга гаргасан байна гэж Зөвлөлийн хурлаар үзсэн. Улмаар 3 телевизэд зөвлөмж, 5 телевизэд мэдэгдэл хүргүүлэхээр шийдвэрлэв. Мөн зөрчил давтагдсан дээрх нэр бүхий 5 телевизэд Өргөн нэвтрүүлгийн зохицуулалтын газраас хууль тогтоомжид заасны дагуу сануулах арга хэмжээ авч, бичгээр хүргүүлэхийн зэрэгцээ, эрх бүхий албан тушаалтнуудтай биечлэн уулзаж, зөвлөгөө мэдээлэл өгч, анхааруулах нь зүйтэй гэж үзлээ.