Харилцаа холбооны зохицуулах хорооны Шуудангийн зохицуулалтын газрын дарга П.Цэрэнням, Гаалийн ерөнхий газрын, Улс хоорондын шуудан илгээмжийн гаалийн газрын дарга Б.Даваасүрэн болон холбогдох албан тушаалтнуудтай 2020 оны 10 дугаар сарын 07-ны өдөр уулзалт хийж дараах асуудлаар харилцах мэдээлэл солилцон, хоёр байгууллагын цаашдын хамтын ажиллагааны талаар санал солилцлоо.

Үүнд:

-Шуудангийн логистик болон газрын шуудан /чингэлэг/-аар нэвтрүүлж буй шуудангийн илгээмжийн гаалийн үзлэг, хяналт шалгалтын орчинг /Газрын шуудангийн терминал/ холбогдох хууль тогтоомжид заасан нөхцөл шаардлагад нийцүүлэн шинээр байгуулах ажилд дэмжлэг үзүүлэн ажиллах;

-Улс хоорондын шуудангийн илгээмжийг улсын хилээр нэвтрүүлэхтэй холбогдуулан гаалийн хяналтын бүсийн холбогдох хууль, дүрэм журмын хэрэгжилт болон эрх бүхий байгууллагаас тогтоосон стандарт, шаардлагыг хэрхэн мөрдөж байгаад хамтарсан төлөвлөгөөт шалгалт хийх;

-Улс хоорондын шуудангийн тусгай зөвшөөрөл эзэмшигчдэд болон шуудангийн байгууллагаар үйлчлүүлэгчдэд, зориулсан сургалт, семинарыг үе шаттайгаар хамтран зохион байгуулах;

-Мөн улс хоорондын шуудангийн үйлчилгээ эрхлэгч 45 хуулийн этгээдүүдийн төлөөлөлтэй уулзан, улс хоорондын шуудангийн бүртгэл хяналтын нэгдсэн системийн хөгжүүлэлт, ашиглалт үйлчилгээний асуудлаар 3талт уулзалтыг зохион байгууллаа.